Joriy yilning 12 iyun kuni “Trastbank” xususiy aksiyadorlik bankida “Rossiya eksport markazining O‘zbekistondagi vakolatxonasi yordamida Roseksimbank (Rossiya)dan jalb qilinayotgan kredit liniyasi shartlari bilan tanishish” mavzuida videokonferensiya tashkil etildi.
Tashqi iqtisodiy faoliyat va valyuta operatsiyalari departamenti tomonidan tashkil etilgan tadbirga Rossiya eksport markazi kompaniyasi guruhi vakili, Trastbank XAB bosh ofisi asosiy xodimlari va filiallari rahbarlari taklif etildi.
Videokonferensiyada “Trastbank” va Roseksimbank o‘rtasida imzolangan kredit bitimi doirasida kredit mablag‘larini jalb qilish, o‘zlashtirish va qaytarish bo‘yicha masalalar, shuningdek kredit mablag‘lari yo‘naltiriladigan bank mijozlarining rejalashtirilgan loyihalari muhokama qilindi.
Maʼlumot uchun:
Roseksimbankning ustav kapitali 2020 yil 1 yanvar holatiga 340 mln. AQSH dollarini, aktivlari - 2 291,9 mln. AQSH dollarini, 2019 yilgi sof foydasi - 25,26 mln. AQSH dollarini tashkil etgan. Bank chet el valyutasida uzoq muddatli kreditlash reytingiga ega. Moody‘s Investors Service xalqaro reyting agentligi maʼlumotlariga ko‘ra, bank reytingi - “Va1” “Barqaror” prognoziga ega.
Joriy yilning mart oyida Roseksimbankda Trastbank XABning Rossiya rubli va AQSH dollaridagi vakillik hisobvaraqlari ochilib, ulardan mijozlar o‘z to‘lovlarini faol amalga oshirmoqdalar.
