Yozni maroq bilan o‘tkazgan bolajonlar maktabdagi birinchi qo‘ng‘iroqni hayajon va quvonch bilan kutishmoqda. Ularning ilm dargohidagi ilk kunini yorqin lahzalarga boy o‘tkazishiga barchamiz birdek mas’ulmiz.
Shu jihatdan, “Trastbank” xususiy aksiyadorlik bankida yangi o‘quv yili arafasida moliya muassasasida faoliyat yuritadigan xodimlarning 1-sinfga qadam qo‘yayotgan farzandlari uchun bayramona ruhda tadbir tashkil etildi. Unda so‘zga chiqqan “Trastbank” XAB Boshqaruv Raisi o‘rinbosari K.Gabbazov bilim dargohi tomon qadam tashlayotgan jajji o‘g‘il-qizlarni yaqinlashib kelayotgan “Birinchi qo‘ng‘iroq” bayrami bilan tabrikladi. Bolajonlarga ustozlari beradigan bilimlarni puxta o‘zlashtirishi va istiqbolda yetuk mutaxassis bo‘lib, Ona Vatan ravnaqiga munosib hissa qo‘shuvchi insonlar sifatida voyaga yetishlarini tiladi.
Tadbirda bolajonlarga barcha o‘quv qurollari jamlangan sovg‘alar topshirildi. Qolaversa, ertak qahramonlari ishtirokidagi sahna ko‘rinishlari, qiziqarli o‘yinlar orqali ular uchun haqiqiy bayram muhiti yaratildi.
“Trastbank” tomonidan an’anaviy tarzda o‘tkazib kelinadigan bunday tadbirlar nafaqat xodimlar, balki ularning oila a’zolari, ayniqsa, ertangi kun-egalariga bo‘lgan samimiy e’tiborni yaqqol namoyon etmoqda. Tabiiyki, bu kabi mehr va g‘amxo‘rlik bolajonlar qalbida unutilmas xotiralar bilan muhrlanadi.
Yangi o‘quv yili arafasida hududlardagi bank xizmatlari ofislarida ham ana shunday bayram tashkil etilib, bolalarga o‘quv qurollari topshirilmoqda.
Manba:
ko'rsatilmagan
/
Ko'rishlar:
572
