Bugun, 24-aprel kuni “Trastbank” xususiy aksiyadorlik banki Bosh ofisida Boshqaruv raisi o‘rinbosari Z.Kurganovning “Tashkent International University”ning akademik ishlar bo‘yicha prorektori A.Absalamov bilan uchrashuvi bo‘lib o‘tdi. Unda moliya muassasasi va mazkur o‘quv yurti o‘rtasidagi samarali hamkorlikni rivojlantirish masalalari muhokama qilindi. Xususan, qo‘shma loyihalar hamda tadbirlarni tashkil etish, talabalarni amaliyotga jalb etish to‘g‘risida so‘z yuritildi.
Bundan tashqari, “Trastbank” XAB va “Tashkent International University” MCHJ o‘rtasida hamkorlik Memorandumi imzolandi. Ushbu hujjat amaldagi o‘zaro sa’y-harakatlarni yangi boshqichga olib chiqishga xizmat qiladi.
Jumladan, TIU bilan hamkorlikda ta’lim, ilmiy-tadqiqot va amaliy faoliyatga qaratilgan qo‘shma loyihalar qo‘llab-quvvatlanadi, talabalar uchun amaliyot, stajirovka va dual taʼlim imkoniyatlari yaratiladi.
Shuningdek, ilmiy-tadqiqot ishlari, innovatsion va startap loyihalarni rivojlantirishda amaliy yordam ko‘rsatilib, bitiruvchilarni ishga joylashtirish masalalari ko‘rib chiqiladi.
