Tezkor va sifatli xizmat ko‘rsatish – muvaffaqiyat garovi
Bank xizmatlari ofislarida mijozlarga xizmatlar ko‘rsatish standartlari bo‘yicha seminar o‘tkazildi
“Trastbank” xususiy aksiyadorlik bankida mijozlarga xizmat ko‘rsatish jarayonini o‘rganish, ularni tahlil qilish va ushbu yo‘nalishdagi muammolarni bartaraf etish masalalariga ustuvor ahamiyat qaratiladi. Shu jihatdan Tashqi marketing kompaniyasi tomonidan Bankning Amaliyot boshqarmasi va hududlardagi Bank xizmatlari ofislarida mijozlarga xizmat ko‘rsatish sifati muntazam ravishda “Sirli mijoz” usuli asosida o‘rganib boriladi.
Yaqinda “Trastbank” XAB Bank bo‘linmalari faoliyatini muvofiqlashtirish departamenti tomonidan “Jizzax”, “Samarqand” va “Buxoro” bank xizmatlari ofislarida “Sirli mijoz” usuli asosida mijozlarga xizmat ko‘rsatish sifatini baholash bo‘yicha o‘tkazilgan navbatdagi o‘rganish natijalari yuzasidan amaliy seminarlar o‘tkazildi.
Ularda BXO va ularning tasarrufidagi markazlari, valyuta ayirboshlash shoxobchalari, “Reception” yo‘nalishlarida ish yurituvchi xodimlarning mijozlarga o‘rnatilgan standartlar asosida xizmat ko‘rsatishiga doir tahliliy maʼlumotlar taqdim etildi.
O‘z faoliyatida yaxshi ko‘rsatkichlarni qayd etganlar e’tirof etilib, xato va kamchiliklarga yo‘l qo‘ygan xodimlarga tegishli ko‘rsatmalar berildi.
Shuningdek, seminar yakunida bank xodimlarining barcha qiziqtirgan savollariga atroflicha javob berildi.