“Trastbank” xususiy aksiyadorlik bankida mijozlarga xizmat ko‘rsatish sifatini oshirish, bu borada joriy etilgan standartlarga rioya etilishini ta’minlash maqsadida moliya muassasasi xodimlarining faoliyati “Sirli mijoz” tadbirlari asosida o‘rganib boriladi.
Amaliyot boshqarmasi va “Toshkent” bank xizmatlari ofislarida “Sirli mijoz” usuli asosida o‘tkazilgan navbatdagi nazorat tadbirlari natijalari bo‘yicha amaliy treninglar bo‘lib o‘tdi. Ularda “Trastbank” XAB Bank bo‘linmalari faoliyatini muvofiqlashtirish departamenti mas’ul xodimlari hamda Tashqi marketing kompaniyasi mutasaddilari tomonidan bank mahsuloti hamda xizmat ko‘rsatish jarayonidagi ijobiy va salbiy jihatlari yuzasidan tahliliy ma’lumotlar taqdim etildi.
Bundan tashqari, “sirli mijoz” nazorat tadbirida qatnashgan har bir xodim kesimida uning baholash anketasi tahlili amalga oshirildi. Jumladan, xodimlarning mijozlarga standartlar asosida xizmat ko‘rsatishda yo‘l qo‘ygan xatolari va yutuqlari muhokama qilindi.
Shuningdek, amaliy treninglar jaryonida xodimlarning xizmat ko‘rsatish sifati, bank mahsulotlari va xizmatlarini yanada takomillashtirishga qaratilgan qator takliflar bildirildi.
