“Trastbank” xususiy aksiyadorlik banki tomonidan respublikamiz bo‘ylab 101 ta mahallada “mahalla bankirlari” va “yordamchi-agent”lar faoliyati yo‘lga qo‘yilgan bo‘lib, ular tomonidan aholining biznes g‘oyalarini ro‘yobga chiqarish, kamg‘allikni qisqartirish bo‘yicha bir qator sa’y-harakatlar amalga oshirilmoqda. Qolaversa, fuqarolarning moliyaviy savodxonligini oshirish, ularning bandligini ta’minlash borasidagi ishlar izchil olib borilmoqda.
Tabiiyki, buning uchun ularning malakasini oshirib borish, moddiy-texnik tomondan qo‘llab-quvvatlash muhim ahamiyat kasb etadi. Shu jihatdan, “mahalla bankiri” ish samaradorligini yanada yaxshilash hamda mavjud platformalardan samarali foydalanishini taʼminlash maqsadida ular metodik qo‘llanmalar va “planshet”lar bilan taʼminlandi.
Albatta, mazkur sa’y-harakatlar o‘zining ijobiy samarasini bermoqda. Buni quyidagi raqamlar misolida ham ko‘rish mumkin. Joriy yil boshidan 1-oktabrga qadar 3 327 ta mikroloyiha amalga oshirildi. Buning natijasida 6 ming 800 dan ziyod yangi ish o‘rinlari yaratildi.
Yana bir jihat. “Mahalla bankirlari” va “yordamchi-agent”larning ish samaradorligini oshirish borasida muntazam ravishda o‘quv seminarlari o‘tkazib kelinmoqda. Samarqandda “Trastbank”ning Jizzax, Samarqand, Buxoro, Qashqadaryo va Surxondaryo viloyatlarida faoliyat yurituvchi “mahalla bankir”lari va “yordamchi-agent”lar uchun tashkil etilgan navbatdagi “team building” tadbirlari jamoalarni bir maqsad sari jamladi. “Mening mahallam – kelajakda farovon mahalla” mavzusida bo‘lib o‘tgan ushbu tadbirda har bir jamoa tomonidan o‘z faoliyati aks ettirilgan sahna ko‘rinishlari namoyish etildi.
Bundan tashqari, biznes-reja tuzish, mijoz bilan ishlash, bank mahsuloti va xizmatlarini sotish bosqichlari, ularning shartlarini tushuntirish, mijoz e’tirozlari bilan ishlash yuzasidan tushunchalar berildi.
Tadbirda kambag‘allikni qisqartirish, yangi ish o‘rinlari yaratish borasida faol ishtirok etib kelayotgan “mahalla bankirlari” va “yordamchi-agent”lar, qolaversa, kichik biznes egalari “Trastbank” tomonidan faxriy yorliq hamda qimmatbaho esdalik sovg‘alari bilan taqdirlandi.
“Trastbank”ning Jizzax, Samarqand, Buxoro, Qashqadaryo va Surxondaryo viloyatlarida faoliyat yurituvchi “mahalla bankir”lari va “yordamchi-agent”lari uchun madaniy tadbir ham tashkil etildi. Samarqanddagi “Boqiy shahar”, Registon maydonida namoyish etilgan lazer shovdan bahramand bo‘lib, zavq tuyishdi.
O‘tkazilgan ushbu tadbirlar, e’tibor va e’tirof ularga jo‘shqin shijoat va haqiqiy motivatsiya berdi, desak mubolag‘a emas.
