Avval xabar berilganidek, O‘zbekiston banklari Assotsiatsiyasi va “UzCard” tomonidan mamlakatimizdagi tijorat banklari o‘rtasida futbol bo‘yicha sport musobaqasi o‘tkazilmoqda. Unda “Trastbank”ning epchil to‘psurarlari ham ishtirok etmoqda.
Shu kunlarda turnirning guruh bosqichi o‘yinlari shiddatli tarzda kechmoqda. 25-oktabr kuni “Trastbank” jamoasi “Octobank” futbolchilariga qarshi maydonga tushdi. Yigitlarimiz o‘zining taktikasi bilan kuchli o‘yinni namoyish etdi. Raqib jamoa darvozasiga ketma-ket 9 marotaba gol urib, mag‘lub etdi. Hisob 9:1.
26-oktabr kuni esa “Trastbank” XAB O‘zbekiston Milliy banki bilan kurashdi. Puxta tayyorgarlik ko‘rish, raqib jamoa o‘yinlarini to‘liq o‘rganish, muntazam o‘z ustida ishlash kabi jihatlarga ustuvor ahamiyat qaratgan Bankimiz yigitlari yuqori ko‘rsatkichlarni qayd etdi. Hayajonli daqiqalarga boy bo‘lgan o‘yinda raqib jamoa darvozasini ikki marotaba ishg‘ol qilishdi. Hisob esa 2:1.
Shu yilning 1-2-noyabr kunlari davom etadigan guruh bosqichi o‘yinlarida “Trastbank” yigitlari “Sanoat qurilish bank” va “Orient finans bank”ka qarshi maydonga tushadi.
