Mamlakatda bank sohasini rivojlantirish, investitsion salohiyatni oshirish va banklarning mijoz uchun ishlashini tashkillashtirish maqsadida ilg‘or xorijiy tajribalardan foydalanish bugungi kunning asosiy masalalaridan biri hisoblanadi.
“Trastbank” xususiy aksiyadorlik banki ham mijozlarga sifatli bank xizmatlarini ko‘rsatish va chakana biznesni rivojlantirish sohasida faol ishtirok etib, xalqaro moliya tashkilotlari bilan o‘zaro hamkorlik aloqalarini mustahkamlamoqda.
Xususan, joriy yilning 1 dekabr kuni “Trastbank” xususiy aksiyadorlik banki va Turkiyaning birinchi litsenziyalangan UPT xalqaro pul o‘tkazmalari tizimi o‘rtasida o‘zaro hamkorlik shartnomasi imzolandi.
Uchrashuvda “Trastbank” xususiy aksiyadorlik banki Boshqaruvi Raisining o‘rinbosari Ziyovuddin Kurganov, Bankning Chakana biznes departamenti direktori Nazirjon Hayitaliyev, Bankning Xalqaro pul o‘tkazmalari bo‘limi boshlig‘i Safar Kulbekov, Turkiyaning UPT xalqaro pul o‘tkazmalari tizimi Bosh direktori – Boshqaruv a’zosi Xakan Ozat, Ijrochi direktori Murat Kastan, Xalqaro hamkorlik aloqalari bo‘limi mutaxassisi Melis Amanmurat va UPT xalqaro pul o‘tkazmalari tizimining O‘zbekistondagi vakili Aziz Asanov ishtirok etdi.
Aytish joizki, mazkur imzolangan shartnomaga asosan endilikda Turkiya va O‘zbekiston fuqarolari ushbu bank xizmatidan foydalangan holda xalqaro pul o‘tkazmalarini (turk lirasi, AQSh dollari, yevro va so‘mda) amalga oshirishlari uchun imkoniyat yaratadi.