2025-yil 17-aprel kuni “Trastbank” xususiy aksiyadorlik banki va O‘zbekiston ipotekani qayta moliyalashtirish kompaniyasi o‘rtasida hamkorlik Memorandumi imzolandi.
O‘zbekiston Respublikasi Prezidentining 2019-yil 13-maydagi “Ipoteka krediti bozorini rivojlantirish va kengaytirishga oid qo‘shimcha chora-tadbirlar to‘g‘risida”gi Farmoniga asosan tashkil etilgan ushbu Kompaniya bugungi kunga qadar qayta moliyalashtirish uchun 4,5 trln so‘mdan ortiq mablag‘ ajratdi hamda 590 mlrd so‘m miqdorida obligatsiyalar chiqardi.
Mazkur hamkorlik Memorandumi “Trastbank” XABda ipoteka kreditlari sonini ko‘paytirish va jozibadorligini oshirishga xizmat qiladi. Jumladan, aholining arzon uy-joylarga bo‘lgan ehtiyojini qondirish uchun bozor tamoyillari asosida moliyaviy resurslarni jalb qilish, jalb qilingan resurslar hisobidan birlamchi va ikkilamchi bozordan uy-joy sotib olish uchun kredit ajratish imkoniyatini yanada kengaytiradi.
Ma’lumot o‘rnida qayd etish joizki, bugungi kunda “Trastbank”da O‘zbekiston Respublikasi Iqtisodiyot va moliya vazirligi mablag‘lari hisobidan birlamchi bozordan xonadon sotib olish uchun 240 oygacha muddatda, yillik 17,5 % da ipoteka krediti ajratish yo‘lga qo‘yilgan. Shuningdek, bankning o‘z mablag‘lari hisobidan birlamchi va ikkilamchi bozordan uy-joy sotib olish uchun 120 oygacha muddatda, yillik 27 % da ipoteka krediti ajratiladi.
Manba:
ko'rsatilmagan
/
Ko'rishlar:
164
