“Trastbank” xususiy aksiyadorlik banki nafaqat bosh ofis, balki hududiy filiallar hamda bank xizmatlari markazlarida faoliyat yuritayotgan xodimlarning malakasini oshirish, ularning bilim va ko‘nikmalarini yanada boyitishga alohida e’tibor qaratib kelmoqda. Xususan, bu borada nufuzli ekspertlar ishtirokida bir qator o‘quv seminarlari tashkil etilmoqda.
Yaqinda “Trastbank” XAB O‘quv markazi hamda Chakana biznes departamenti tomonidan Samarqand shahrida moliya muassasasining Samarqand, Jizzax, Qarshi, Termiz va Buxoro filiallari chakana biznes bo‘limlari hamda BXM xodimlari uchun navbatdagi seminar o‘tkazildi.
“Jismoniy shaxslarga mikroqarz berish tartibi hamda ularga ajratilgan kreditlarni monitoring qilish” mavzusida tashkil etilgan mazkur o‘quv seminarida Chakana bank xizmatlarini sotish boshqarmasi boshlig‘i U.Malikov hamda Jismoniy shaxslarga ajratilgan kreditlarni monitoring qilish boshqarmasi boshlig‘i X.Umarov tomonidan zarur ma’lumotlar berildi.
Bundan tashqari, tadbir doirasida Bankning O‘quv markazi Xodimlarni o‘qitish va rivojlantirish bo‘limi boshlig‘i R.Burxanova va Respublika ma’naviyat va ma’rifat markazi eksperti, “Ma’rifat” targ‘ibotchilar jamiyati a’zosi, falsafa fanlari doktori, professor J.Shermuxamedova seminar ishtirokchilariga bugungi kunda moliya muassasalarining jamiyatdagi o‘rni, shuningdek, har bir bank xodimining mijozlar bilan ishlashida ahamiyat qaratishi zarur bo‘lgan jihatlarga doir o‘z tavsiyalarini berdi. Qolaversa, amaliy mashg‘ulotlar orqali tushunchalar berildi.
Shuningdek, tadbir doirasida qadimiy va hamisha navqiron Samarqand shahri bo‘ylab ekskursiya ham tashkil etildi.