Joriy yilning 11 mart kuni “Trastbank” bosh ofisida Toshkent davlat texnika universiteti 1-bosqich magistrlari va Bankning Kuzatuv Kengashi a’zosi Mohira Karimova boshchiligida “Banklarda korporativ boshqaruv” mavzuida davra suhbati bo‘lib o‘tdi.
Tadbirda Toshkent davlat texnika universitetning “Korporativ boshqaruv” kafedrasi dotsentlari Ahadjon Is’hoqov va Muhammadjon Tolipovlar ishtirok etdi.
Davra suhbati davomida banklardagi zamonaviy korporativ boshqaruvning ishtirokchilari - tartibga solish va nazorat qilish agentliklari, ya’ni bank sektorida risklarni boshqarish bilan bog‘liq me’yorlarni tartibga solish, banklar faoliyatining strategik yo‘nalishlari, banklarda yuqori darajali yangi risklarni vujudga keltiruvchi moliyaviy omillarning oldini olish masalalariga alohida to‘xtalib o‘tildi.
Tadbir ishtirokchilari bugungi kunning dolzarb masalalari, ya’ni bank kreditlari va raqamli iqtisodiyot borasida o‘zlarini qiziqtirgan savollariga javob olishdi.
Dotsent Ahadjon Is’hoqov universitet talabalarining bank haqidagi tushunchalarini yanada kengaytirish maqsadida, Trastbank hamda universitet o‘rtasidagi o‘zaro aloqalar bundan keyin ham rivojlanishini, shu bilan birga mazkur hamkorlik aloqalari kelgusida bank uchun yetuk mutaxassislarni voyaga yetishida muhim omil bo‘lishiga e’tibor qaratdi.
Suhbat yakunida mehmonlarga bankning estalik sovg‘alari taqdim etildi.