O'zbekiston Respublikasi Prezidentining 2020 yil 24 fevraldagi “Moliyaviy hisobotning xalqaro standartlariga o‘tish bo‘yicha qo‘shimcha chora-tadbirlar to‘g‘risida”gi qaroriga muvofiq, barcha yirik soliq to‘lovchilar, shu jumladan, tijorat banklari ham o‘zlarining moliyaviy hisobotlarini xalqaro standartlar talablari asosida amalga oshirishlari qayd etilgan.
Albatta, bu borada buxgalterlar va moliyaviy hisobotni tayyorlashga masʼul bo‘lgan xodimlar malakasi va kasbiy ko‘nikmalarini oshirish maqsadga muvofiq.
Qolaversa, har bir yirik soliq to‘lovchi Moliyaviy hisobotning xalqaro standartlari bo‘yicha o‘quv kursini muvaffaqiyatli topshirganligi to‘g‘risida hujjatga yoxud xalqaro sertifikatlardan biriga ega bo‘lishi hamda ular yetarli bilim va tajribaga ega bo‘lgan buxgalteriya xizmati xodimlari bilan taʼminlanishi talab etiladi.
Shu o‘rinda O‘zbekiston Respublikasi Moliya vazirligi tashabbusi bilan “IFRS Academy” platformasida bepul onlayn o‘quv kursi tashkil etildi.
"Trastbank" xususiy aksiyadorlik banki Bosh ofisi Moliyaviy hisobotning xalqaro standartlarini tatbiq etish boshqarmasi xodimlari 2021 yil davomida mazkur o'quv kursida qatnashib, uning barcha bosqichlarini muvaffaqiyatli tugatdi. Boshqarma tashabbusi bilan Buxgalteriya hisobi va hisoboti departamenti xodimlari, shuningdek, filiallar bosh buxgalterlarining ham ushbu o‘quv kursida ishtirok etishlari tashkil etildi.
Bugun, 25 iyul kuni ushbu o‘quv kursini muvaffaqiyatli tamomlagan bank xodimlariga maxsus sertifikatlar topshirildi.
Ushbu tadbirda Moliya vazirligining masʼul xodimi I.Sherimbetov va “Trastbank” XAB mutasaddilari ishtirok etib, mazkur kursning ahamiyati hamda uning keyingi bosqichlarida ishtirok etish zaruriyati yuzasidan tavsiya va ko‘rsatmalar berdi.
