O‘zbekiston Respublikasi Prezidentining 2024-yil 12-avgustdagi “Faktoring xizmatlari bozorini jadal rivojlantirish chora-tadbirlari to‘g‘risida”gi Farmoni ijrosini ta’minlash maqsadida “Trastbank” xususiy aksiyadorlik banki tizimida faoliyat yuritayotgan xodimlarning bu borada bilim va ko‘nikmalarini oshirishga qaratilgan turli o‘quv mashg‘ulotlari o‘tkazilishi rejalashtirilgan.
Bugun 20-sentabr kuni “Trastbank” XABda “Faktoring afzalliklari va ishlash mexanizmlari” mavzusida o‘quv seminari tashkil etildi. Unda Toshkent davlat iqtisodiyot universiteti “Bank hisobi va auditi kafedrasi” mudiri, professor Zafar Umarov ishtirok etib, mavzuga oid taqdimot qildi.
Seminarda faktoringning afzalliklari va ishlash mexanizmlari, undan kimlar foydalanishi mumkinligi kabi mavzularda ma’lumotlar berildi. Xususan, ta’kidlanganidek, faktoring xizmati tadbirkorlar va kompaniyalarga o‘z mijozlariga kechiktirilgan to‘lov sharoitida mahsulot yoki xizmatlar taqdim etish imkonini beradi. Kompaniya mijozdan to‘lovni kutmasdan, faktor (bank yoki moliya tashkiloti) yordamida o‘z mablag‘larini tezroq oladi.
Bu orqali kompaniya likvidligi yaxshilanadi va moliyaviy muammolarni yengillashtiradi. Ya’ni faktoring – bu pul oqimlarini barqarorlashtirish va biznesni rivojlantirish uchun samarali yechim hisoblanadi.
