2023-yil 9-yanvar kuni “Trastbank” xususiy aksiyadorlik banki bosh ofisida Komplaens nazorat departamenti tomonidan “Bank xodimlari uchun sanksiyaviy komplaens” mavzusida seminar-trening o‘tkazildi.
Unda moliya muassasasi rahbariyati, dunyodagi eng yirik professional xizmatlar ko‘rsatuvchi tarmoqlardan biri hisoblangan KPMG auditorlik va konsalting kompaniyasi mutasaddilari, Bank bosh ofisi xodimlari hamda videokonferensaloqa tarzida filiallarda faoliyat yuritayotgan xodimlar ishtirok etdi.
Ta’kidlash joizki, KPMG — professional xizmatlarni taqdim etuvchi dunyoning eng yirik tarmoqlaridan biri hisoblanadi. Mazkur tuzilmaning xalqaro shtab-kvartirasi Buyuk Britaniyada joylashgan.
Seminarda “komplaens” tushunchasi, ushbu tizimni joriy etishning ahamiyati va afzalliklari to‘g‘risida so‘z yuritildi. Qolaversa, uning funksiyalari va bu borada xalqaro tajriba hamda mamlakatimizdagi mavjud qonunchilik haqida tushunchalar berildi.
Shuningdek, O‘zbekiston bank sektoridagi kuzatilishi mumkin bo‘lgan sanksiya xatarlari, xizmatga qabul qilishda kontragentlarni tekshirish kabi masalalarga ham urg‘u berildi.
