Bugun, 26-noyabr kuni “Trastbank” xususiy aksiyadorlik banki aksiyadorlarining navbatdan tashqari umumiy yig‘ilishi bo‘lib o‘tdi. Uni “Trastbank” XAB kuzatuv Kengashi Raisi Tohir Sharipov olib bordi.
Yig‘ilishda kun tartibiga kiritilgan qator masalalar ko‘rib chiqildi. O‘tgan yillardagi taqsimlanmagan foydani taqsimlash, umumiy zaxira fondini shakllantirish to‘g‘risidagi masalalar shular jumlasidandir.
Bundan tashqari, “Standart” deb tasniflangan aktivlar bo‘yicha ehtimoliy yo‘qotishlarni qoplash uchun zaxiralarni shakllantirish, Bank kuzatuv Kengashi aʼzolarini saylash to‘g‘risidagi masalalar diqqat markazida bo‘ldi.
Yig‘ilish ishtirokchilariga Bank tomonidan joriy yilning o‘tgan davri mobaynida amalga oshirilgan ishlar yuzasidan batafsil axborot berildi. Qolaversa, aksiyadorlar kun tartibidan o‘rin olgan masalalar borasida atroflicha fikr yuritib, o‘zlarini qiziqtirgan savollarga batafsil javob olishdi.
Shuningdek, kun tartibidagi masalalar yuzasidan tegishli qarorlar qabul qilindi.