Xotira va qadrlash – xalqimizning asriy qadriyatlari, ulugʻ fazilatlaridan biri sanaladi. El-yurtning tinchligi, osoyishtaligi, erki va ozodligi uchun kurashgan insonlar hamisha xalqimiz ardogʻidadir.
Shu o‘rinda, Ikkinchi jahon urushi faxriylarini qancha eʼzozlasak shuncha kam. Xalqimizning o‘ziga xos insonparvarlik va bag‘rikenglik fazilatlari urush yillarida yaqqol namoyon bo‘lgan. Boshpanasiz, ota-onasidan ayrilib evakuatsiya qilingan bolalar, ayollar va keksalarga ota-bobolarimiz boshpana berib, hatto bir burda nonni ham ular bilan birga baham ko‘rgan.
Bugun “Trastbank” xususiy aksiyadorlik banki xodimlari 9-may – Xotira va qadrlash kuni arafasida bir qator urush va mehnat fronti faxriylari holidan xabar oldi.
Poytaxtimizning Shayxontohur tumanida istiqomat qiluvchi urush va mehnat faxriylari bugungi dorilomon kunlarning qadriga yetish zarurligini, tinchlik bebaho ne’mat ekanligini ta’kidladi. Keksa otaxon-u onaxonlar jonajon ona Vatanimizning tinchligi va chiroyiga ko‘z tegmasin deya duolar qilishdi.
Ta’kidlash joizki, tarixning suronli davrida yuksak insonparvarlik namunalarini ko‘rsatgan faxriylarimizning hayot yo‘li kelgusi avlod vakillari uchun haqiqiy ibrat maktabi bo‘lib qoladi.