Joriy yilning 19 yanvar kuni “Trastbank” xususiy aksiyadorlik bankining O‘quv markazi va Ichki nazorat departamenti bilan hamkorlikda “O‘zbekiston Respublikasida jinoiy faoliyatdan olingan daromadlarni legallashtirish va terrorizmga qarshi kurashish bo‘yicha Yevrosiyo guruhi (YeAG) tomonidan o‘tkaziladigan o‘zaro baholash jarayonlari” mavzusidagi amaliy seminar tashkil etildi.
Seminarda “Trastbank” xususiy aksiyadorlik banki Bosh ofisi rahbar xodimlari, Amaliyot boshqarmasi va bankning barcha filiallari Ichki nazorat bo‘limlari mutaxassislari, O‘zbekiston Respublikasi Bosh Prokuraturasi huzuridagi Iqtisodiy jinoyatlarga qarshi kurashish departamenti xodimlari Sh.Xamidov, O.Tursunov, M.Azimov va O‘zbekiston Respublikasi Markaziy bankining Kredit tashkilotlarida moliyaviy monitoringni muvofiqlashtirish va valyuta nazorati departamenti mutaxassisi A.Sadiyevlar ishtirok etdi.
Amaliy seminar davomida O‘zbekiston Respublikasi Markaziy banki va Respublika Bosh prokuraturasi huzuridagi soliq, valyutaga oid jinoyatlarga va jinoiy daromadlarni legallashtirishga qarshi kurashish departamenti tomonidan «Tijorat banklarida jinoiy faoliyatdan olingan daromadlarni legallashtirishga va terrorizmni moliyalashtirishga qarshi kurashish bo‘yicha ichki nazorat qoidalari»ga kiritilgan qo‘shimcha va o‘zgartirishlarga alohida to‘xtalib o‘tildi.
Shu bilan birga, joriy yil O‘zbekiston Respublikasida jinoiy faoliyatdan olingan daromadlarni legallashtirish va terrorizmga qarshi kurashish bo‘yicha Yevroosiyo guruhi (YeAG) tomonidan o‘tkaziladigan o‘zaro baholash jarayonlariga ko‘rilayotgan tayyorgarliklarga oid masalalar muhokama etildi.