Joriy yilning 14 mart kuni «Trastbank» xususiy aksiyadorlik banki Toshkent davlat iqtisodiyot universitetida 2019-2020 o‘quv yili bitiruvchilari uchun o‘tkazilgan “Karera kuni” axborot-tanishtiruv tadbirida qatnashdi.
Tadbirda O‘zbekiston Respublikasi Oliy va o‘rta maxsus ta’lim vazirligi, Iqtisodiyot va sanoat vazirligi, Moliya vazirligi, Bandlik va mehnat munosabatlari vazirligi, Davlat qo‘mitalari, Bosh prokuratura, Markaziy bank, tijorat banklari, shuningdek, mulkchilikning turli shakllaridagi 200 dan ortiq kompaniyalar, firmalar rahbarlari va mutaxassislari shuningdek, Britaniya kengashining mamlakatimizdagi vakolatxonasi, Yevropa Ittifoqining Erasmus+ dasturi vakillari hamda qo‘shma korxonalar vakillari ishtirok etdilar.
Tadbirning ochilish qismida so‘zga chiqqanlar ta’lim va fan sohasini rivojlantirish bo‘yicha uzluksiz ta’lim tizimini yanada takomillashtirish, sifatli ta’lim xizmatlari imkoniyatlarini oshirish, bank tizimi uchun zamonaviy ehtiyojlarga mos yuqori malakali kadrlar tayyorlash siyosatini davom ettirishda tijorat banklari va oliy ta’lim muassasalari o‘rtasidagi mustahkam hamkorlik aloqalari alohida o‘ringa ega ekanligini qayd etdilar.
Tadbir davomida tijorat banklari vakillari tomonidan talabalar uchun mahorat darslari o‘tkazildi. Bakalavriat va magistraturaning bitiruvchi kurs talabalari bilan taklif etilgan bank vakillari o‘rtasida ishga joylashish va kasbga yo‘naltirish bo‘yicha muloqotlar olib borildi. Hozirgi kunda Toshkent davlat iqtisodiyot universitetida bakalaviriat bosqichida 14 ta ta’lim yo‘nalishi hamda 23 ta magistratura mutaxassisligi bo‘yicha kadrlar tayyorlanmoqda.
Qayd etilishicha, 2019-2020 o‘quv yilida universitetni tamomlayotgan 1106 nafar bitiruvchi bo‘lib, shundan bakalavriat bosqichida 865 nafar va magistratura bosqichida 241 nafarni tashkil qiladi.
