2019 yilning 4 dekabr kuni “Trastbank” xususiy aksiyadorlik bankining Bosh ofisida O‘zbekiston Respublikasi Prezidentining 2017 yil 23 maydagi “Ichki ishlar organlarining yong‘in xavfsizligi bo‘linmalari faoliyatini tubdan takomillashtirish chora-tadbirlari to‘g‘risida”gi PQ-2992-sonli qarori ijrosini ta’minlash maqsadida hamda qish mavsumida havoning keskin sovib ketishi oqibatida insonlar hayoti xavfsizligini ta’minlash va is gazidan zaharlanish oqibatlarining oldini olish chora-tadbirlarini kuchaytirish masalasida amaliy seminar bo‘lib o‘tdi.
Tadbirda bankning xavfsizlik departamenti bo‘limi boshlig‘i Nasim Tursinov, Shayxontohur tumani yong‘in xavfsizligi bo‘limi inspektor-serjanti Farrux Raximov, bo‘lim inspektor-serjanti Fazliddin Axmedov, Bosh bank va Amaliyot boshqarmasi mutaxassislari ishtirok etdi.
Tadbir davomida tabiiy gazning to‘liq yonmasligi, bexosdan uzilib qolishi, xona ichida to‘planishi, yoqib qarovsiz qoldirish, ulashda xavfsizlik qoidalariga rioya qilmaslik oqibatida portlash, yong‘in, hamda tabiiy va is gazidan zaharlanish holatlari bilan bog‘liq sodir bo‘layotgan favqulodda vaziyatlar haqida so‘z yuritildi. Bunday holatlar hatto insonlarning turli xil tan jarohati olishi yoki o‘limi bilan yakunlanayotganligi haqida bank xodimlari ogohlantirildi.
