Trastbank “Ayollar klubi”da navbatdagi trening bo‘lib o‘tdi.
Trastbankda ayol-xodimalarni qo‘llab-quvvatlash, rag‘batlantirish, ishchanlik ruhini ko‘tarish, rahbarlikka tayyorlash maqsadida tashkil etilgan “Ayollar klubi” doirasida bo‘lib o‘tgan navbatdagi trening “Oilaviy xotirjamlik va nizolar oldini olish”ga bag‘ishlandi.
O‘z uyi – oilasi davrasida o‘zini xotirjam va baxtli his qilgan ayolning ish unumi ham ko‘ngildagidek bo‘ladi. Agar oila notinch, oila a’zolari inoq bo‘lmasa-chi?
O‘zbekiston Respublikasi Xotin-qizlar jamoatchilik Kengashi a’zosi, Respublika Ma’naviyat va ma’rifat Markazi eksperti, falsafa fanlari doktori, professor kabi qator maqomlarga ega Jamila Shermuhamedova Trastbank xodimalari bilan o‘z hayotiy tajribalari, maslahatlari bilan bo‘lishdi.
Xususan, oilada nizo kelib chiqqanda oila manfaatlarini ustun qo‘yish, bemavrid kelgan jahlni bartaraf qilish usullari, biror masala ustida tortishish emas, balki kompromisga kelish, farzandlar oldida bir-biriga chiroyli munosabatda o‘rnak bo‘lish kabi bir qarashda ahamiyatsizdek tuyuladigan, ammo kundalik muhim masalalar davra suhbatida muhokama qilindi.